Mikabat na sa walo ang namatay sa landslide sa Barangay Guisad Surong sa Baguio City, sumala sa Baguio City Public Information Office.
Basi sa pinakabag-ong report gikan sa City PIO alas 7 sa gabii, walo ka tawo ang kumpirmadong patay, samtang tulo ang gikatahong missing.
Duha ang naluwas, samtang usa sa tulo ka survivor nga unang gidala sa ospital ang gikataho nga namatay tungod sa ilang mga samad.
Naluwas usab sa mga rescuer ang usa ka iro gikan sa landslide area.
Sa pagkakaron, nagpadayon ang search, rescue ug retrieval operations sa lugar samtang gipangita sa mga awtoridad ang mga tawo nga wala pa mailhi.
Nahitabo ang landslide mga alas 7 sa gabii niadtong Domingo, taliwala sa padayon nga kusog nga ulan sa siyudad.
Tulo ka balay ang naigo sa landslide, nga nakaapekto sa lima ka pamilya.
Sumala ni Baguio City Mayor Benjamin Magalong, ang mga residente nga nagpuyo sa duol nga mga lugar nga giisip nga taas og risgo sa landslide gipabakwit na.
Samtang, ang mayor miingon nga 13 pa ka landslide ang natala sa lain-laing mga bahin sa Baguio City tungod sa walay hunong nga ulan.
Tungod niini, ang kinatibuk-ang ihap sa mga insidente sa pagdahili sa yuta nga natala sa siyudad miabot na sa 14.
Nagpasidaan si Magalong nga ang mga insidente mahimong modaghan samtang magpadayon ang dili maayong panahon.
