Gikataho nga labing menos walo ka mga tawo ang namatay tungod sa mga insidente sa pagbaha ug pagdahili sa yuta nga gipahinabo sa Tropical Cyclone Basyang, sumala sa report.
Matud sa tigpamaba sa Office of Civil Defense (OCD) nga si Junie Castillo, upat ka miyembro sa usa ka pamilya ang namatay sa Cagayan de Oro City human natabunan sa midahili nga yuta.
Kini sumala sa usa ka report gikan sa city disaster risk reduction and management office nga gipadala sa OCD Region 10.
Samtang, si Iligan City Mayor Frederick Siao, mitaho og tulo ka kamatayon sa iyang siyudad, bisan nga giimbestigahan pa sa mga awtoridad ang hinungdan sa ilang kamatayon.
Ingon man nga adunay natala nga usa ang namatay sa Agusan del Norte human nalumos, sumala sa OCD Caraga.
Gipahibalo usab sa Philippine Atmospheric, Geophysical and Astronomical Services Administration (PAGASA) nga ang Basyang mihinay ngadto sa usa ka low-pressure area (LPA) sayo sa Sabado sa buntag human miigo sa yuta sa Mindanao ug Visayas sa lima ka higayon, hinungdan nga mihinay ang bagyo samtang kini mitabok sa yuta.
Sa ilang weather bulletin sa alas 5:00 sa buntag, ang state weather bureau miingon nga ang LPA katapusang nakit-an sa habagatan-sidlakan sa Cuyo, Palawan, ug naglihok paingon sa amihanan-kasadpan sa gikusgon nga 25 kilometros matag oras.
Sa pinakabag-o nga situational report sa National Disaster Risk Reduction and Management Council (NDRRMC), mokabat sa 30 ka barangay sa rehiyon sa Caraga ang gibahaan, nga nakaapekto sa 64,360 ka pamilya o 232,550 ka indibidwal sa kinatibuk-ang 517 ka barangay.
Diin kini nga gidaghanon, 16,528 ka pamilya o 53,983 ka tawo ang kasamtangang nagpasilong sa 480 ka evacuation center, samtang 4,489 ka pamilya o 16,807 ka indibidwal ang gitabangan sa gobyerno gawas sa mga evacuation facility.
Gitaho usab ang kadaot sa imprastraktura, lakip ang tulo ka dalan ug duha ka tulay sa Caraga nga dili na maagian.
