MANDAUE CITY-Nakasinati og dili makaangayon nga pagtratar ang dili mominos sa 80 ka mga empleyado sa Brgy. Umapad sa dakbayan sa Mandaue, kini human nga wala makadawat sa ilang suweldo sa miaging lima ka buwan o sukad niadtong Enero ning tuiga.
Apil niini ang mga barangay tanod, clean and green personnel, lupon members, ug drivers, ug uban pa.
Ilang gipaambit usab nga manghulam nalang kini og kwarta alang sa ilang inadlaw-adlaw nga panginahanglanon.
Gani ang pipila sa ilaha nagduhaduha na sa pagtungha sa ilang trabaho tungod sa kalisod ug wala mahatagan og sweldo sulod sa lima ka buwan.
Ingon man nga naglaum sila nga masulbad sa daling panahon ang isyu sa ilang sweldo.
Matud ni Barangay Kapitan Reb Cortes, nga dili maproseso ang payroll sa sweldo sa ilang mga empleyado tungod kay pirmahan pa kini ni Konsehal Libertine Lumapas, ang chairperson sa Committee on Appropriations.
Sa pakighinabi sa Bombo Radyo Cebu Newsteam kang Kapitan Cortes, iyang gipaambit nga gikuwestiyon ang pag-release sa suholan niadtong Disyembre tungod kay ang napirmahan lang mao ang payroll sa mga opisyal ug wala maapil ang payroll sa labing menos walo ka mga empleyado sa nahisgutang barangay.
Dugang pa sa opisyal nga nipasar usab kini sa payroll niadtong buwan sa Abril apan sama sa nahitabo, payroll lang sa mga opisyal ang gipirmahan ug wala giapil ang mga dili opisyal.
Gani, gisusi kini ug gipangutana ni Cortes ang Committee on Appropriations sa hinungdan sa maong kakuliyang ug tubag niini daw adunay kuwang sa ilang mga assessment.
