CEBU CITY-Nasikop ang nagpa-ila nga Special Investigator sa NBI human kini mangilad sa iyang kabanay sa Cebu. Giila ang nasikop nga si Avednigo Origenes.
Matud ni NBI 7 Director Patricio Bernales nga gisikop nila ang suspek human nga midangop sa ilang buhatan ang anak sa kabanay sa biktima niini kung diin kauban sa biktima gisundan nila ang suspek ug didto nasikop niadtong February 14.
Gibutyag pa sa babae nga gitago sa pangalan nga “Royroy” nga 4 na buwan nila nga nakaila ang suspek human kini mismo ang misikop sa iyang igsoon tungod sa giingong traffic violation kung diin gipapuyo pa kini nila sa ilang balay nga walay bayad human nga giingong gisiguro niini ang ilang proteksyon ug gisiguro nga dili makasuhan ang iyang igsoon sa gihimo niini nga paglapas sa trapiko.
Apan nagduda na ang pamilya tungod kay nangayo na kini og kwarta isip bugti sa ilang proteksyon nga muabot na sa dul-an tunga sa milyon ug gigamit pa niini ang sakyanan sa iyang igsoon.
Mga fake nga ID’s ug ID sa NBI hasta na usab ang usa ka kalibre nga armas nga adunay 3 ka magazine ang nakuha gikan sa suspek.
Kaso nga usurpation of authority ug illegal position of firearms ang nakatada nga ipasaka batok sa suspek.
Gi-awhag usab ni Bernales ang mga nabiktima sa suspek nga mudangop sa ilang buhatan.
