CEBU CITY – Mugradwar isip Cum Laude ang usa ka security guard karung hapon sa usa ka kolehiyo dinhi sa dakbayan sa Sugbo.
Human ang 20 katuig pagka-security guard ni Erwin Macua, 38 anyos nga taga Trinidad, Bohol ug adunay tulo ka mga anak, mahuman kini isip cum laude sa kurso nga Bachelor of Elementary Education major in General Education sa St. Theresa’s College.
Sa pakighinabi sa Bombo News Team ni Macua, gibutyag niini nga dili sayon ang iyahang nakab-ot nga kalampusan gumikan kay gikinahanglan pa niini nga idungan ang pagka-sekyu, amahan ug pagka-estudyante.
Napili niini nga kuha-on ang nahisgutang kurso human nga napamahal na niya ang mga tinun-an ug gusto siya nga mamahimong parte sa kalampusan sa ilahang mga kinabuhi.
Nasayran nga gigamit ni Macua ang iyahang tinigom arun masugdan ang iyahang pagtuon ug dakong katingala niini sa dihang adunay wala magpaila nga tawo ang nag-sponsor kaniya hangtud sa iyahang pagtapos.
Mensahe na lang niini sa publiko nga dili babag ang edad ug kahago arun nga kab-oton ang mga pangandoy.
Dugang pa niini nga gikinahanglan lang ang pagpaningkamot, determinasyon ug pagsalig sa Labaw nga Makagagahum arun nga makab-ot ang tinguha sa kinabuhi.
Human sa iyahang graduation karung adlawa, plano ni Macua nga ipadayon una ang iyahang pagka-security guard samtang mangandam sa umaabot nga Licensure Examination arun nga mamahimong lisensyado nga magtutudlo.
