Cebu City-Napuno gihapon sa kahadlok ang mga residente sa Inabangga ug Clarin subay na sa padayon nga pagpangita sa mga otoridad sa uban pang mga miembro sa Abu Sayyaf Group sa Probinsya sa Bohol. Matud ni Governor Edgar Chatto nga duna gihapoy kahangawa ang mga tawo nga basin mahitabo na usab ang engkwentro sa ilang lugar ug maangin sila sa maong engkwentro.
Matud pa ni Chatto nga sa pagkakaron muabot na ngadto sa 2000 kapin ang mga residente ng gikan sa duha ka mga lungsod ang gipabakwit ug kasamtangang anaa sa mga designated evacuation center. Gitataw pa ni Chatto nga usa sa ilang gikakuyawan mao nga masubli ang engkwentro tali sa mga bandidong grupo ug mga otoridad sa panahon sa kagab-ihon hinungdan nga matag gabie mubalik gayud sila sa mga evacuation centers.
Samtang gibutyag ni Clarin Mayor Allen Piezas nga muabot na ngadto sa 10 ka mga baranggay ang apektado sa operasyon sa mga otoridad batok sa mga nahabilin pang ASG members.Lakip sa mga apektado mao ang Brgy Bacani, Nahawan, Caboy,Kaluwasan,Nataob,Bonbon, Candajec,Lajog, Cabog ug Poblacion Centro.
Gibutyag pa sa Mayor nga susamang mag panic ang mga residente pananglitan makakita sa mga tropa sa army. Matud pa ni Pieza nga dili gayud mahupay ang kahadlok sa mga residente hangtud nagpabilin pang gawasnon ang uban pang miembro sa ASG sa ilahang lugar.
