CEBU CITY-Nagpadayag sa iyang habig si Cebu Archbishop Jose Palma human sa deklarasyon sa presidente og Martial Law sa kinatibuk-ang Mindanao human nga gi-atake sa Maute Group ang Marawi City.
Matud ni Palma nga uyon siya niini gumikan kay mi-uyon man usab si Cotabato City Cardinal Orlando Quevedo. Sigon ni Palma nga gi-respeto niya ang pag-uyon sa Cardinal tungod kay mas aduna kini kahibaw sa sitwasyon tungod kay didto kini nadistino.
Gitataw usab ni Palma nga dili siya kaingon nga adunay maayo nga sangputanan ang Martial Law sa Mindanao tungod kay nakadepende sila sa evaluation sa mga tao nga nagpuyo mismo didto.
Samtang gihimug-atan sa Arsobispo nga dili siya uyon sa giingon sa Presidente nga posible nga palapdan pa niini ang Martial Law hangtud dinhi sa Visayas.
Matud ni Archbishop nga ‘premature’ o sayo pa para isulti kini bisan paman nga gihimug-atan sa Presidente nga ang mga rebelde nga grupo naa ra sa palibot. Dugang ni Palma nga maghatud lang kini og kalisod sa mga tao ilabina dinhi sa Cebu nga wala may hulga sa kadaot.
Subay niini naglaum og misalig si Palma nga magtinabangay ang gobyerno ug publiko para maresolba ang problema nga gi-atubang sa nasud karon ug protektahan ang matag usa dili lang sa panahon ng Martial Law.
