CEBU CITY – Susamang anaa sa panganod ang gibati sa duha ka Top 1 sa Certified Public Accountant Board Examination.
Sa pakighinabi sa Bombo Radyo kang Vianca Pearl Amores, gibutyag niini nga walay kabutangan ang iyahang kalipay gumikan kay mao kini ang iyahang gi-ampo matag gabii ug iyaha gayud kini nga gipangandaman.
Nahimo nga preparasyon niini sa wala pa ang eksaminasyon mao ang pag-review matag alas 9 sa buntag hangtud na sa alas 12 sa tungang gabii apan maggahin usab siya og 15 minutes break matag oras.
Gipaambit usab niini ang iyahag kalisod sa dihang estudyante pa siya nga hapit nang wala niini maabot ang average rate ug ibalhin sa laing kurso.
Sa pagkakarun, plano ni Amores nga mag-bakasyon, pawala sa stress una niini atubangon ang iyahang pagka-Certified Public Accountant.
Samtang ang ig-agaw usab niini nga Top 1 usab sa maong exam nga si Marianito Jesus Del Rio ang ‘overwhelm’ usab sa migawas nga resulta diin matud pa nga wala pa siya karun kasabot sa iyahang gibating kalipay.
Nahimo usab niini nga preparasyon mao ang pag-review matag adlaw ug ang pag-ampo.
Sigon niini nga iyaha nang naandan ang pagbasa-basa og libro hayan wala na siya maglisod panahon sa iyahang pag-review.
Ang duha pulos produkto sa University of San Carlos.
Nagpasalamat ang duha sa ilahang nahimong inspirasyon, ang ilahang mga pamilya, higala ug ang Labaw nga Makagagahum.
Mihatag usab og mensahe ang duha nga determinasyon ug kakugi nga dunganan og pag-ampo ang gikinahanglan arun nga makab-ot ang mga pangandoy sa kinabuhi.
