CEBU CITY-Nagkanayon si Jonji Gonzales kinsang chief of staff sa Presidential Assistant for the Visayas nga dili angay nga kahadlokan ang Martial Law nga gitawag nila karon og Duterte Edition.
Kini human sa ilang gipahigayon nga consultative meeting nga gipanguluhan ni Mike Dino ang Presidential Assistant for the Visayas kalabot sa hisgutanang martial law ug ang posible nga pagpalapad niini hangtud sa Visayas.
Gihimug-atan ni Gonzales nga nagkanayon si Dino nga kinahanglan lang nga mangandam ang tanan ug kung ugaling madeklarar gyud ang Martial Law dinhi sa Visayas kinahanglan nga suportaan kini tungod kay walay lain gusto ang Presidente kung di ang masulbad lang ang problema sa nasud ug makabaton og kalinaw.
Gipasalig usab niini nga dili na pareha sa una ang martial law diin naay mu-abusar nga militar tungod kay mismo karon si Duterte, dili gusto sa paagi sa Martial Law nga nahitabo sa una.
Samtang mipasalig usab ang PRO-7 Dir. nga si P/C Supt.Noli Taliño ug si Lt. Gen Lactao sa Centcom kinsang mitambong usab sa maong consultative meeting nga dili mahitabo ang pangpangabuso sa kapulisan dinhi sa Sugbo kung ugaling magdeklarar og Martial Law dinhi.
Subay niini, gi-awhag nila ang publiko nga magtinabangay ang tanan ug suportaan ang mga desisyon ni Presidente Rodrigo Duterte.
