CEBU CITY-Pakyas ang kampo ni Bohol Board Member Niño Rey Boniel pinaagi sa iyahang legal counsel nga si Atty Handel Lagunay sa pagpa-release niini sa prisohan.
Dala ni Atty Lagunay ang release order gikan sa sala ni Bohol RTC Branch 52 Hon. Judge Marivic Paray diin ihatag unta kini niya kang RID Chief Sr/Supt Jonathan Cabal.Apan nahulog kini nga ‘useless’ human nga wala diha si Sr/Supt Cabal ug giingong walay midawat sa order.
Subay niini, igo na lang sa pagpasabot si Lagunay sa iyahang kliyente nga kinahanglan nila nga tahuron ang desisyon sa kapulisan.Nanghinaut na lang ang maong manlalaban nga tumanon sa kapulisan ang desisyon sa korte sa pagpagawas sa iyahang kliyente gumikan kay lagpas naman usab kini 36 ka oras nga naka-detain apan wala sa gihapo’y kaso nga gipasaka.
Matud pa ni Atty Lagunay sa dihang nahinabi sa Bombo News Team nga dili na unta angayan nga ipaagi pa og inquest ang iyahang kliyente gumikan kay lagpas na kini 36 ka oras nga naka-detain.
Hinuon, andam man usab ang ilahang kampo nga tahuron ang desisyon sa RID kung ugaling ipasaka gayud ang kasong paricide sa adlaw nga Martes.
Sa pagkakarun, padayon nga nagtingkagol sa Fuente Police Station si Board Member Niño Rey Boniel.
