CEBU CITY-Padayun ang gihimong imbestigasyon sa Cebu Provincial Detention and rehabilitation Center (CPDRC) ug sa Provincial Public Safety Company ang motibo sa pag-amok sa usa ka piniriso niadtong sabado sa gabie kung diin dili muubos sa lima ka kauban niini ang samdan. Nagdumili usa nga pangalanan ni CPDRC OIC Warden , Mr. Bobby Legaspi ang mga piniriso nga apil sa maong insidente samtang padayun pa ang imbestigasyon.
Matud ni Legaspi nga nigamit ug gunting ug upat ka pulgadang lansang ang suspek sa pagpanunggab niini sa mga kauban. Gituohan nga gi-una ug dunggab ang usa ka high profile inmate sa nahisgutang presohan apan sa dihang gipugngan kini sa uban pang piniriso , gipangdunggab usab kini sa maong suspek.
Dali kini nga girespondihan sa mga miyembro sa Provincial public safety company nga maoy nakabantay sa CPDRC ug dali nga gibutang ang suspek sa bartolina. Gidala usab sa infirmary sa jail facility ang mga nasamdan kauban na ang usa ka high profile inmate nga nakabaton ug daghang dinunggaban sa lawas.
Dili makatuo ang high profile inmate nga biktima nga mabuhat kini sa maong suspek mahitungod kay dugay na kining kauban sulod sa nahisgutang jail facility.
Giklaro usab ni Legaspi nga walay koneksyon sa ilegal nga droga ang maong insidente.
Nasayran nga usa ka ex-convict ang suspek nga dunay kasong murder ug illegal possesion of firearms samtang ang high profile inmate kay anaa usab kaso nga murder.
Nailhan ang CPDRC mahitungod sa dancing inmates niini apan nalambigit usab kini sa kontrobersiya karong tuiga mahitungod sa mikatag nga hubo nga hulagway sa mga piniriso sa dihang gipahigayon ang greyhound inspection.
