CEBU CITY-Hingpit na nga gihunong ang search and retrieval operation human nga gisuwayan pag-usab sa retrieval team ug pagpangita sa kadagatan sa Lapu-lapu City Cebu karong adlawa apan pakyas gihapon nga makita ang lawas sa napatay nga Mayor sa Bien Unido Bohol nga si Mayor Gisela Boniel.
Matud ni Police Regional Office -7 Dir. nga si PCSUPT Noli Talino nga ila na nga gilukop tanan parte sa kadagatan ug sa 38 ka dive nga gihimo sa mga divers sulod sa 15 diyas, wala man lay sinyales nga nakit-an ang grupo nga naa didto ang lawas sa mayor
Matud pa ni Talino nga bisan pakyas sila nga makuha ang lawas ni Mayor Gisela, dili sila mu-atras sa kaso tungod kay kumpleto sila sa ebidensya ug witnesses nga makapamatuod nga si BM Rey Nino Boniel ang mipatay sa asawa niini.
Matud niya nga ila karong tutukan ang seguridad sa pamilya sa mga state witness ilabina nga giingong gikamang sa kampo sa boardmember para mubaliktad kini sa ilang mga statement.
Gibasol usab sa usa sa mga state witness ang kampo ni PB Boniel nga giingong mao kini ang hinungdan sa pagkamatay sa amahan niini tungod kay na-pressure nga dili nalang mu-tumestigo batok sa board member.
Samtang matud ni PCI Jacinto Mandal Jr. ang nangulo sa retrieval team nga bisan og hingpit na nga gihunong ang retrieval operation dili gihapon kini negatibo tungod kay nakuha man nila ang usa ka habol nga positibo nga giila ni Angela Leyson ang best friend ni Mayor Gisela Boniel nga mao kadto ang habol sa Dive Camp kung diin nagpamasahe sila sa Mayor.
Sa karon giingong maghuwat nalang sila sa resulta gikan sa crime laboratory sa mga ebidensya nga ilang nakuha.
