CEBU CITY-Giingong andam nga maghatag og security escort ang kapulisan kang Peter Lim para sa iyang pag-atubang sa preliminary investigation karong umaabot nga Agosto 14 ug 17 sa Metro Manila.
Kini human nga mipatim-aw si Lim pila ka adlaw human nga gihatod ang subpoena sa iyang pinuy-anan gumikan kay giingong nahadlok kini para sa iyang kinabuhi ug seguridad human nga ginganlan siya ni Presidente Rodrigo Duterte nga nalambigit sa transaksyon sa iligal nga drogas sa nasud.
Matud sa Regional Dir. sa Police Regional Office (PRO-7) nga si PCSUPT. Jose Mario Espino nga walay angayan nga kahadlokan si Lim tungod kay giingong ila man kini nga bantayan atol sa imbestigasyon.
Apan gitataw usab ni Espino nga maghatag lang sila og haom nga secuirty escort kana kung murequest si Lim ug iyang gisiguro nga atol lang sa preliminary investigation sila mu-provide og security.
Dugang pa ni Espino nga ila usab karon nga gi-validate ang nadawat nila nga impormasyon nga matud pa adunay mga bodyguard si Lim.
Samtang, pa-imbestigaran usab ni Espino si Antonio Rosellosa ang secuirty guard nga midawat sa subpoena sa pinuy-anan ni Lim tungod kay nasayran nila nga expired na diay ang licensya niini.
Matud niya nga mao nga wala nakauniform ang security guard tungod kay dili kini lisensyado. Padayon usab nila karon nga gisuta ang security agency sa maong guard ug kung mapamatud-an nga wala kini agency gisiguro niya nga mag-atubang kini og kaso nga adunay kalapasan sa security agency law ang nahisgutang gwardiya.
