CEBU CITY-Patay ang duha ka bata ug usa ka hingkud samtang narescue usab ang 8 ka tao human nga gi-anod sa dakong sulog sa tubig sapa sa dihang nahugno ang taytayan nga kahoy sa Sitio Riverside Banawa Brgy. Guadalupe Cebu City.
Giila ang namatay nga managsuon nga sila si Carlo Taran 8 anyos ug Juross Taran 9 anyos ug ang lain ang namatay mao si Arthuro Cabradilla, 26 anyos.
Una niini mibunok ang kusog nga uwan hinungdan nga mitaas ang tubig sapa sa nahisgutang lugar. Matud ni Cebu City Councolir Dave Tumulak ang Deputy Mayor for Police Matters nga nagkagubot ang mga biktima tungod sa nakitang sawa nga gi-anod sa baha.
Matud sa konsehal nga samtang nagkagubot na ang mga biktima nga nagtungtong sa tuulay, adunay usa ka tao ang naglukso-lukso hinungdan nga nahugno ang tulay. Tungdo na usab kay ginama lang sa light material ang maong taytayan ug gabok na usab mao nga dali kini nga nahugno.
Lakip sa mga narescue si Nestor Taran ang amahan sa biktima.
Muabot sa 3 oras ang pagpangita sa duha ka bata ug emosyunal ang nahimong eksena sa dihang ang amahan pa mismo sa biktima ang mi-alsa sa patay lawas sa iyang anak samtang mihaw-as sa sapa.
Nunot, niini gipahimangnu-an ni Tumulak ang publiko nga dili gyud magtambay sa mga tulay kung adunay kusog nga uwan tungod kay dako ang posibilidad nga mahugno kini.
