Gipahayag ni Ramon Sevilla, usa ka Urban and Regional Planner, nga kinahanglan gayod ipaubos sa pampublikong pagsusi o public scrutiny ang bag-ong Comprehensive Land Use Plan (CLUP) sa Dakbayan sa Sugbo.
Atol sa pakighinabi sa Bombo Radyo Newsteam kang Sevilla, gipaambit niini nga naghimo sila og pagtuon basi sa maong bag-ong CLUP ug nakita nga dako ang kakuwang sa partisipasyon sa publiko sa paghimo niini.
Tungod daghang mga residente ang walay kasayuran bahin sa sulod sa maong plano, busa gihatagan niya og pagtagad ang dakong pagbag-o sa paggamit sa yuta o land use sa Barangay Pulang Bato, kini nunot sa nahitabong landslide niadtong Oktobre 9.
Diin sa 2020 land use map, anaa sa dul-an 60% hangtod 65% sa Pulang Bato ang nakategorya nga forested o reserve areas o dark green, samtang 40% lang ang residential area.
Apan sa bag-ong CLUP alang sa 2023–2032, nabaliktad na ang estado, nahimo nang halos 65% ang residential area ug naggamay na pag-ayo ang mga forested area.
Ingon man nga base sa datos sa Philippine Statistics Authority (PSA) gikan sa tuig 2000 hangtod 2024, misaka og 129% ang populasyon sa Barangay Pulang Bato.
Sa gihimong pagtuon ni Sevilla basi sa datos sa Philippine Statistics Authority (PSA), nisaka og gibana-banang 129% ang populasyon sa Pulang Bato gikan sa tuig 2000 hangtod 2024, samtang padayong nisaka ang “population density” niini sa nagkalainlaing obserbasyon sa tuig 2000, 2010, 2015, ug 2020 hangtod na sa 2024.
Tungod niini, nalakip ang kabukirang barangay sa Pulang Bato sa 19 ka barangay sa dakbayan nga nakasinati og “persistent intensification” o kanunay nga pagtaas sa populasyon ug urbanisasyon sa kakahoyan o kabukiran.
