Cebu City- Nanghina-ot si Lingayen Dagupan Archbishop Emeritus Oscar Cruz nga mahimong maayo ang relasyon sa mga tawo sa simbahan ug sa gobyerno. Kini human usab sa gipakita ni Presidente Rodrigo Duterte ug repsteto ngadto na sa haya ni Cebu Archbishop Emeritus Rocardo Cardinal Vidal.
Matud ni Cruz nga ang gipakita sa presidente ang makatandug sa kasingkasing, dalaygon hilabi na sa paghawok niini sa lungon sa Cardinal. Gibutyag usab niini nga ang gipakita sa Presidente nagtimaan lamang nga dunay pagkasinabot ang simbahan ug ang gobyerno. Matud pa nga pinaagi niini hingpit nga maghiusa ang gobyerno ug ang simbahan .
Samtang, uyon si Archbishop Cruz sa tinguha nga himuong santo si Cardinal Vidal. Matud ni Archbishop Cruz nga usa ka maayong tawo ang cardinal diin sa kadugay nila nga nagkauban wala kini nailhan nga nahimong kaaway sa mitaliwan nga Cardinal.
Gihulagway pa niini si Cardinal Vidal nga usa ka mapainubuson nga tawo taliwa sa posisyon niini sa simbahan. Matud pa ni Cruz nga si Cardinal Vidal ang naningkamot nga mahimong santo sila si San Lorezo Ruiz ug San Pedro Calungsod apil na ang pag proseso sa cannonization ni Bishop Teofilo Camomot.
Hinuon gipasabot ni Cruz nga dili sayon ang proseso aron mahimong santo ang usa ka tawo diin daghan pa kining agi-an ug muagi pa sa makuting pagsusi sa Vatican.
