CEBU CITY – Gibana-banang tunga sa bilyon ang danyos nga namugna sa sunog sa Metro Ayala Department Store.
Kini ang gibutyag ni BFP Regional Director Samuel Tadeo.
Matud ni Tadeo nga padayun ang ilang pakigkumbate para maapula ang kalayo sa nahisgutang mall.
Sigon pa niini nga usa sa nasinati nila nga problema ang kusog nga hangin ug kabaga sa aso hinungdan nga dili sila kaayo makasulud sa maong area.
Gumikan nga enclosed man ang maong mall dili pwede kini masudlan ug mga bombero hinungdan nga external fire fighting ang ilang gibuhat.
Usa usab ang kusog nga hangin sa rason sa pag-ulbo sa kalayo dapit sa fabric section sa mall.
Gisiguro ni Tadeo nga walay makaduol nga indibidwal sa maong area gumikan nga aduna may puruhan nga mucollapsed ang maong building sanglit nagtakilid naman kini ug nagliki-liki.
Sa pagkakaron, dili pa makasulti ang maong director kung kanus-a nila makontrolar ang dakong sunog nga mitumaw sa Metro Ayala Department Store.
Samtang gisiguro sa management sa nasunog nga Metro Ayala Department Store nga dili maapektuhan ang operasyon sa ilang mga stakeholders.
Kini ang gibutyag ni Atty. Vince Tumaning, ang chief legal council sa Metro Gaisano Ayala.
Matud ni Tumaning nga buhatun nila ang kutob sa ilang makaya para lang mafix ang problema nga namugna sa maong sunog.
Gumikan nga matud pa primary concern man nila ang seguridad sa ilang kliyent ug mga trabahante.
Dugang ni Tumaning nga kung unsa man ang nasabotan nila sa ngadto sa mga kliyente sa kontrata mao kini ang ilang i-comply isip pagsiguro na usab sa mga insurance niini.
Gibutyag pa ni Tumaning nga padayun ang sweldo sa dul-an 500 ka mga apektadong trabahante sa maong mall kini gumikan nga i-assign man kini sa uban pa nga mga branches sa nahisgutang mall.
Wala usab tuohi sa management ang mga mikatap nga balita nga gituyo ug sunog ang maong mall ug gipadangat pa niini ang pagkasubo sa nahitabong insidente.
