Cebu City-Under control na sa mga bombero ang sunog sa Metro Department Store Ayala human ang sobra 24 ka oras nga pakigkumbate. Kini mao ang gikompirmar ni Fire Senior Superintendent Samuel Tadeo ang director sa Bureau of Fire Protection (BFP-7).
Matud ni Tadeo nga posibleng madeklarar na usab nila nga fire out ang sunog karong adlawa.
Wala na usab ang baga nga aso nga nakamugna og zero visibility sa pipila ka mga parte ug kasikbit nga bahin sa Ayala Mall.
Dugang pa niini, nagsugod na usab silag pahigayon og overhauling sa sulod sa maong mall. Nag-amping pa gihapon ang mga bombero sa pagsulod sa sulod tungod sa kabalaka nga mahugno ang building.
Mahinumduman nga niadtong Biyernes sa gabii pa nagsugod ang sunog. Sa karon, gisuta pa sa mga otoridad ang hinungdan sa maong insidente.
