Cebu City-Dako ang pasalamat ni Apostolic Nuncio to the Philippines Archbishop Gabriele Giordano Caccia ngadto nila ni Cebu Archbishop Jose Palmaug sa Basilica Minore del Santo Niño kalabot sa pag-imbitar kaniya aron nga musaksi sa selebrasyon sa kapyestahan ni Senyor Santo Niño.
Sa homilee sa Pontifical Mass nga gipahigayun gabii ni Caccia sa Basilica Minore del Santo Niño, gipaambit niini ang matud pa talagsaun ug malipayun nga kasinatian sa Cebu samtang nakisalmot sa nagkalain-laing aktibidad sa kapiyestahan sa maong balaang bata.
Matud ni Caccia nga makabilib matud pa ang debosyon sa mga Pilipino ilabi na ang mga deboto ni Senyor Santo Niño gumikan nga ang tibuok lungsod, gisayawan ug gikalipay man ang pagsaulog sa maong kapiyestahan.
Matud pa niini nga ilado ang Pinoy sa lukop kalibutan nga kanunayng mupahiyom ug malipayung tawo ug kini gumikan matud pa nahibaluan naman sa Pinoy nga gihigugma sila sa Ginoo.
Dugang pa ni Caccia nga gibida matud pa sa Santo Papa ngadto kaniya ang nahimong kasinatian niini niadtong panahon nga nibisita kini sa Pilipinas, ilabi na ang dili mabayloan nga debosyon sa mga Pilipino.
Isip pasalamat sa nahimong kasinatian sa Sugbo, gihatagan ni Archbishop Caccia ug blessing ni Pope Francis ang mga tawo nga misalmot sa gipahigayun nga misa.
Wala usab niini palabya ang pagsayaw sa Tradisyunal Sinulog Ritual samtang gipas-an ang imahe ni Senyor Santo Nino.
