Cebu City- Aduna nay upat ka persons of interest ang Mambaling Police Station kabahin sa pagpusil patay sa usa ka ex-convict kagabie sa Sitio Biking , Brgy Mambaling dakbayan sa Sugbo.
Ang biktima mao si Jonathan Pagusara, 34 anyos ug matud pa usa ka ex convict sa kaso niini nga may kalabigitan sa iligal nga drogas ug pagpangawat.
Matud ni Po1 Jefrey Gutwal sa Mambaling PNP nga posible nga drug related ang motibo sa pagpatay sa biktima gumikan na usab sa background niini.
Nasayran nga nagkaon sa usa ka pungko pungko si Pagusara sa dihang giduol kini sa suspek ug gipusil sa nagkadaiyang bahin sa iyahang lawas. Gumikan sa daghang samad pinusilan nga naangkon niini, patya diha-diha dayon ang biktima samtang dali usab nga miikyas ang biktima sakay sa motorsiklo.
Naangol usab ang usa ka 16 anyos nga babaye human matapsingan sa bala apan anaa na kini karon sa luwas nga kahimtang. Padayon pang gisuta sa kapulisan ang identity sa suspek.
