Cebu City- Disidido nga mupasaka og kaso ang pamilya sa 18 anyos nga babae nga giingong biktima sa gang rape kagahapon sa kaadlawon sa may dakbayan sa Mandaue.
Matud sa maguwang nga lalaki sa biktima nga pasakaan gyud nila og kaso ang mga suspetsado nga mga minor de edad usab sanglit dili mabaylo ang ka uwaw nga ilang bation ug ingon man ang depression nga masinati sa iyang manghud nga gipangtamas-tamasan. Tataw pa niini nga ang iyang manghud nag sige nalang og hinuktok ug maghilak.
Una niini, giingong ang maguwang nga babae sa biktima nga 21 anyos ang maoy giimbitar og inom sa 6 ka suspek sanglit barkada raman nila kini ug gipakuyug nalang usab kini.Sa dihang nahubog na ang biktima, nagkanayon ang usa sa mga suspect nga dad-on kini sa taas sa boarding house aron ipahimutang kay hubog na.Nahibulong nalang matud pa ang maguwang sa biktima nga aduna namay naglagubo ug didto nakita niya nga gipanamastamasan na ang iyang manghud. Samtang , gibutyag ni PO1 Mary Gretel Amaba, sa Women and Children’s Protection Desk (WCPD) sa Mandaue City Police Station 5, nga upat sa unom ka suspek sa giingong pag gang rape sa usa ka 18 anyos ang mi-angkon samtang 2 niini ang mihimikak.
Matud ni Amaba nga basi sa ilang pakighinabi sa biktima , nga wala na kini makasukol sanglit gikuptan man siya sa 4 ka mga suspek hinungdan nga napanamastamasan gyud kini.Samtang, mihimakak usab ang usa ka suspect sa giingong pagpanglogos ug nagkanayon kini nga igo lang nila nga gi-assist ang biktima kay kini nahubog na ug wala siyay kalabutan sa pasangil nga logos. Kasong rape ang ipasaka sa mga tanang suspetsado bisan kadtong miingon ng wala silay labot sanglit kauban man sila atol sa panghitabo.Gumikan sa kakuwang sa facility sa DSWD, gikustudiya usa sa Police station 5 ang mga suspek samtang gipaabot ang desisyon sa korte kung asa ibalhin ang mga suspek nga mga menor de edad.
Subay niini, gibutyag ni Amaba nga subli nila karon nga hilingon ang mga tindahan sa dakbayan sa Mandaue nga namaligya og mga ilimnon ug ilang imbestigaran usab ngano nga nakapalit ang mga suspect ug ilimnon nga mga minor de edad paman kini.
Ilang inspeksyunon kung mituman ba kini sa city ordinance nga dili mubaligya og ilimnonng makahubog sa mga minor de edad.
