CEBU CITY – Napuno sa kasubo ang mga residente sa Ronda Cebu samtang nag-atang sa pag-abot sa patayng lawas ni Ronda Vice Mayor Atty. Jonnah John Ungab.
Pasado alas onse ganinang udto sa dihang naabot sa lungsod sa Ronda ang patayng lawas ni Atty. Ungab diin haya-un kini karong gabii sa dili pa ihatod sa katapusan nga pahulayan ugmang hapon sa Ronda Cemetery.
Gi-agi usa sa municipal hall ang lungon sa bise mayor kung diin nahatagan ug higayun ang mga residente nga makit-an ang ilang vice mayor sa katapusan nga higayun.
Dili usab malikayan nga mamahimong emosyunal ang pipila ka indibidwal ilabi na ang matud pa natabangan ni Atty. Ungab nga mga benepisyaryo sa scholarship niini sa maong lungsod.
Nagpahigayun usab ug necrological service diin usa sa mga nihatag ug mensahe si Ronda Mayor Mariano Blanco.
Nasayran nga last term na unta karon ni Atty. Ungab isip bise mayor sa Ronda at matud pa plano unta niini nga mudagan isip mayor sa umaabot 2019 midterm elections.
Samtang, hangtod karon wala pa gihapo’y gipanganlan nga suspek ang PNP ug NBI sa rehiyon 7, kinsa maoy naghupot sa kaso sa pagpatay sa maong abogado.
