Cebu City-Hingpit nang gihatod sa katapusang kapahulayan si Vice Mayor Atty. Jonnah John Ungab gahapong adlawa sa Public Cemetery sa lungsod sa Ronda, probinsya sa Sugbo diin gitambungan ang maong lubong sa abogado sa 8 mil ka mga indibidwal nga gilangkuban sa pamilya, kahigalaan, supporters ug kaubanan nga opisyales niini, suot ang puti nga senina.
Dili sama sa naandan, usa ka dekarga ang gikargahan sa lungon sa maong abogado diin aduna kini gitapad nga pigura sa anghel nga ginama sa puti nga bulak.
Sa kilid sa maong sakyanan adunay gibutang nga tela nga adunay suwat nga hustisya para ni Atty. Ungab. Nahimong emosyunal ang mga mitambong ilabi na sa nabiyaan nga pamilya sa abogado. Gani sa gipahigayun nga Eulogy, gikantahan pa sa anak nga lalaki nga si John Daniel Ungab ang iyang amahan sa kanta nga “Close to You” gumikan nga sa maong kanta mahinumduman man niini ang iyang amahan.
Natapos ang masulob-on nga adlaw sa pamilya Ungab sa pagpalupad ug puti nga balloon samtang inanay nga gisulod ang lungon sa maong abogado sa nitso niini.
Mahinumduman nga gibanhigan patay si Atty. Ungab sa wala pa mailhi nga riding in tandem niadtong niaging semana sa dakbayan sa Sugbo.
