CEBU CITY – Mukabat sa 300,000 pesos ang kantidad sa Marijuana nga giibot ug nasakmit sa Cebu City Mobile Action Force sa Cebu City Police Office sa Sitio Mapa, Brgy Tagbao, Cebu City kagahapon.
Matud ni PSupt Timar Alam ang hepe sa Mobile Action Force ug usa sa mga nangulo sa operation nga nagpahigayon lang unta sila og minor operation sa Sudlon 2 niining Dakbayan sa dihang adunay usa ka concern citizen ang miduol kanila gitaho ang usa ka siting sa marijuana plantation sa may Brgy. Tagbao.
Hinungdan nga gi-adto kini nila ug didto ilang nakita ang mga punu-an sa marijuana nga maayo kaayo pagkatanom sanglit lisod agi-on ang dalan ug dili usab kini mabantayan nga marijuana diay.
Gihulagway pa ni Alam nga 5 km pa ang lakwon ayha maka-abot sa area nga gitamnan sa mga marijuana ug yuta pa usab kini sa gobyerno.
Muabot sa 1,285 ka mga fully growns stalks ang na-ibot samtang 1,537 ka mga young stalks ang nakuha kung diin muabot kini sa 2,822 ka mga punuan.
Nasayran nga mapalit ang fully grown marijuana sa kantidad nga 100 pesos samtang ang mga linghud nagkantidad og 50 pesos.
Giturn-over na ang mga nasakmit nga marijuana ngadto sa PDEA-7 aron sa proper disposal niini.
