Cebu City-Gikompirmar ni Engr.Josefa Ylanan ang head sa Office of the Buiding Official (OBO) nga walay temporary facility permit ang nahugno nga bunkh ouse nga gipanag-iya sa J.E Abraham Lee Construction and Development Incorporated nga gikamatay sa 5 ka tao ug gika-angol sa laing sobra 60 ka taona.
Matud ni Engr. Ylanan nga usa ka illegal structure ang naasoy nga bunkhouse tungod kay gawas sa wala kini permit dili usab kini haom nga himoong quarters sa mga trabahante.
Nunot niini, gisuspendi sa OBO ang operation sa tanan nga proyekto nga gihimo sa naasoy nga construction firm sa dakbayan sa Sugbo samatang padayon ang imbestigasyon.
Nakatakda usab nga magpadala og notice of suspension ang OBO sa maong firm sa pinakadali nga panahon. Samtang naka-uli na usab ang mga trabahante nga gidala sa hospital human naka-angkon og mga samad tungod sa insidente.
Samtang matud sa pamilya sa mga namatay na,gipasaligan matud pa sila sa J.E Abrahamn nga sila ang mutubag sa tanan nga gastos sa ilang mga trabahante sa tambalanan hasta na usab ang pagpalubong niini sa 5 ka mga namatay.
Una niini, kalit nga nahugno ang bunk house kaganihanhg kaadlawon kung diin naangol ang gatusan ka mga construction worker nga nag-istar niinig maong bunkhouse
Miabot sa sobra 5 ka oras ang search and rescue operation kung diin mimando usab dayon si Cebu City Mayor Tomas Osmena sa OBO ug sa Department of Engineering and Public Works, sa Cebu City nga pa-imbestigaran kini.
Nasayran nga niadtong tuig 2016 nahimong kontrobersyal usab ang nahisgutang construction firm human nga usa sa mga trabahante niini ang namatay tungod kay natabunan sa nahugno nga koral sa ilang site nga gitukuran sa ilang proyekto nga condominium sa Barangay Labangon kung diin ay nadiskubrehan sa kadugayan nga wala diay usab demolition permit.
