CEBU CITY – Selos nga dili mapugngan mao ang gihungdan nga misangpot sa madugoon nga panghitabo ang unta tam-is nga paghigugmaay sa magti-ayong Cuizon.
Giila ang suspek nga si Rafael Cuizon, 22 anyos samtang ang misis niini mao si Anerin Cuizon, 23 anyos, ug nagpuyo sa Sitio Tambis, Purok Maglaum, Barangay Umapad, dakbayan sa Mandaue.
Sa eksklusibong pakighinabi sa Bombo Radyo sa suspek, direkta kining mi-angkon sa iyang gihimong pagdunggab patay sa iyang asawa ug matud pa wala siya nagmahay.
Gibutyag niini nga atubangan na siya nga gibu-ang sa iyang asawa gani mi-angkon pa kini nga aduna siyay relasyon sa lalaki nga kauban sa trabaho.
Pagsaysay pa ni Rafael nga adunay higayon nga sa balay pa nila matulog ang duha ug nasaksikhan na usab niya ang ‘sweetness’ sa duha. Wala na matud pa naagwanta sa suspek ang ilang sitwasyon diin kanunay na lamang sila maglalis.Miabot pa sa punto nga sugoon na siya sa pagpahikog sa iyang asawa.
Dugang pa sa suspek nga giingnan na usab niya ang lalaki nga mulayo na ug dili na sila samokon pa sa iyang asawa apan mitubag lang matud pa kini nga dili mahimo sanglit kauban man sila sa trabaho.
Tungod niini, iyang gidunggab ang iyang asawa sa makaduhang higayon.
Bisan pa man sa nahitabo, emosyonal nga gipahayag sa suspek nga bisan og nahimo niya ang maong krimen, gihigugma gihapon niya ang iyang asawa ug iyang dawaton ang silot nga ipahamtang kaniya.
Kasong parricide ang atubangon suspek ug sa karon nakadetain na kini Mandaue City Police Office.
