CEBU CITY-Sobra pa sa overkill kung mahulagway sa kanhi asawa ni SPO1 Adonis Dumpit nga si Josephine.
Kini human nga nakita mismo sa iyang mga mata ang kagrabehon sa mga igo ni Dumpit didto sa Punerarya sa Bohol sa dihang mi-adto kini human sa nahitabo.
Matud ni Josephine nga kuwang nalang tagud-taguron ang iyang kanhi bana tungod sa kadaghan sa igo diin nakita niya nga mitu-asik pa ang utok.
Dili usab siya kombinsido nga drug operation ang nahitabo ug naay shoot out diin nakapabuto pa og usa ka magazine si Dumpit nga nahitabo sanglit sa iyang pagka-ila niini grabe kini ka sharp shooter ug dili siya mutoo nga dili kini makaigo kun nagpinusilay man gani.
Dugang pa usab niini nga tungod kay duna siyay kasayuran sa paghupot og armas, iyang napanglantawan nga sa mga igo sa iyang kanhi bana susama nga gitiwasan kini.
Gihimug-atan usab niini nga imposible nga nalambigit si Dumpit sa iligal nga drogas sanglit sa ilang 15 ka tuig nga panag-ipon wala gyud kini miduwa niini.
Gihaya ang patay nga lawas ni SPO1 Dumpit sa Cosmopolitan Funeral Homes sa Junquera St. niining dakbaya human miabot kagahapon ug wala pa matino kung kanus-a ilubong.
