CEBU CITY-Sikop ang 19 anyos nga lalaki human nga nalutsan og warrant of arrest sa kasong kalapasan sa Anti-Photo and Video Voyeurism Act of 2009.
Kini human nga gipakatap niini ang hubo nga hulagaway sa iyang kanhi hinigugma sa social media.
Giila ang nasikop nga si Genesis Villa Centillas alyas “jade” ug nagpuyo sa Sitio Mangga Brgy. Bajay Sibonga.
Matud ni PCI Leo Deofiles ang hepe sa Anti Cyber Crime Group-7 nga dunay complaint nga nadawat ang ilang buhatan gikan sa 14 anyos nga babae tungod kay gipakatap sa iyang ex-boyfriend ang iyang hubo nga mga hulagway.
Nunot sa maong complaint gipasakaan dayon og kaso si Centillas ug wala naabti og tuig nalutsan dayon kini og warrant og arrest.
Dali ra usab nalocate ang pinuy-anan sa akusado ug nasikop ra dayon kini.Nasuta nga gibuhat sa lalaki ang pagkatag sa hubo nga hulagway sa 14 anyos nga babae tungod kay dili madawat niini nga gibuwagan siya.
Subject for drugtesting usab karon ang nasikop aron sayron kung kini mugamit ba og iligal nga drogas sanglit human nga miangkon kini na duna nay nahitabo kanila sa babae ug posibleng pasakaan kini og kasong rape, mikatawa ra kini.
Nasayran usab nga milanat rana og buwan kapin ang relasyon sa duha ug sa social media sa usab sila nagka-uyab.
