CEBU CITY-Tulo ang patay sa nitikyaob nga bangka sa Brgy. Madridejos lungsod sa Alegria kagahapon.
Ang mga biktima giila nga sila si Rosalyn Desirrie Peligro, 31 anyos ang panuigon, molupyo sa dakbayan sa Sugbo, Albert Lopez, 24 anyos ug si Ruby Desirrie Peligro, 27 anyos ug parehong molupyo sa Brgy. Sta. Filomena lungsod sa Alegria.
Gibutyag ni PO2 Melvin Batok ang Desk Officer sa Alegria Police Station nga gikan kini sila nag outing sa Batong Malunhaw Beach Resort ug padong na kini manguli ang mga biktima.
Nangabang kini sila ug bangka ug gumikan sa kakusog sa bawd hinungdan nga nitikyaob ang maong bangka.
Matod pa ni PO2 Batok nga 14 ni sila kabuok ang gakuyog ug 11 ang nakalangoy ug naluwas apan ang tulo niini nakabsan gyud sa kinabuhi.
Gisuwayan pa sa pagdala ang mga biktim sa tambalanan apan gideklarar kining dead on arrival.
Nasayran nga ang maong bangka walay life jacket.
Sa pagkakaron gitanggong na ang driver sa maong bangka nga si Jadrel Bindolo samtang gihikay pa sa kapulisan sa Alegria Police Station ang kaso nga ipasaka batok niini.
