CEBU CITY – Gipaslak sa prisuhan ang usa ka 37 anyus nga ama-ama human nga gilugus ang iyahang 14 anyus nga stepdaughter ug unum ka higayun diha mismo sa ilahang panimalay sa Sitio Lourdes Bajac, Barangay Poblacion, lungsod sa Liloan, probinsya sa Sugbo.
Sa pakighinabi sa Bombo Radyo kang Police Supt. Randy Corret, ang hepe sa Liloan Police Station, gisaysay niini nga mismong ang principal sa tunghaan kung diin nag-tungha ang biktima, ang mitawag kanila arun nga ipahibalu ang nahitabung pagpanglugus.
Matud ni Corret nga nabantayan sa adviser sa biktima nga nagluya ug susamang adunay problema ang iyahang tinun-an hinungdan nga iyaha kining gipakig-isturyahan.
Giingung naghilak ang biktima samtang misaysay ngadtu sa iyahang maestra ang gihimu sa iyahang ama-ama.
Subay niini, dali nga gipahibalu sa adviser ang principal sa maong problema sa menor de edad.
Dugang pa sa hepe nga wala gilayun makasumbung ang biktima gumikan kay gihulga kini sa suspek nga pusilon.
Nasayran nga gumikan nga anaa sa abroad nagtrabaho ang inahan sa biktima hinungdan nga nahimu sa suspek ang krimen sugud niadtung 7 anyus pa lang hangtud nga nag-14 anyus na ang bata.
Sa pagkakarun, anaa na sa kustodiya sa Municipal Social Welfare and Development ang biktima, samtang mag-atubang ug kasong 6 counts of rape ang suspek.
