CEBU CITY – Mikabat sa tunga sa milyon ang danyos sa nahitabung sunog kagabii sa Sitio Bahaw, Barangay T.Padilla, dakbayan sa Sugbo.
Sa pakighinabi sa Bombo Radyo kang SFO4 Jovito Abelgas sa Bureau of Fire Protection 7, gibutyag niini nga nagagikan ang kayo sa gipa-abangan nga balay ni Era Oteda.
Basi sa inisyal nga imbistigasyon, gisaysay ni Abelgas nga nakakita ang anak sa tag-iya sa balay nga adunay aso gikan sa kwarto ni Raymond Visen kinsang usa sa mga nag-abang.
Gumikan kay ginama sa light materials, dali nga gilamuy sa kayo ang 50 ka mga panimalay.
Hinu-un, wala may natala nga namatay o samdan sa maong sunog.
Sa pagkakarun, wala pa masuta sa mga bombero ang hinungdan sa sunog apan gumikan sa daghang nakakita nga gikan sa kwarto ni Visen ang kayo hayan ipatawag kini sa opisina sa BFP alang sa dugang imbistigasyon.
Samtang, gitataw usab ni T.Padilla Barangay Kapitan Michael Ralota nga pribado ang maong luna nga giturukan sa mga panimalay nga nasunog ug gikatakda na unta nga demolison sunud buwan.
Gisiguro usab sa kapitan nga adunay temporaryo nga kapasilungan ang mga apektadong residente pinaagi sa calamity fund ug nangayu na usab kini ug ayuda sa lokal nga kagamhanan sa syudad.
