CEBU CITY-Nakatakda nga ikanselar sa Mactan-Cebu International Airport (MCIA) ang ilang flights karong Setyembre para tarungon ang mga lubak-lubak nga runway.
Kini ang pamahayag ni MCIA General Manager nga si Atty. Steve Dicdican human makadawat og reklamo nga naguba og nangaflat ang mga ligid sa ilang eroplano.
Sugdan ang pag-ayo sa sobra sa 10 ka runway karong Setyembre 1gikan sa alas-2 sa kaadlawon hangtud alas-8 sa buntag nga gibana-banang mulanat og 3 ka semana. Dugang pa ni Dicdican nga kini para sa kaluwasan sa mga pasahero.
Tungod niini dunay cancellation sa mga byahe sa kaadlawon, mapa-national o international man kung diin muabot sa 84 flights ang makanselar matag adlaw. Bisan paman og lauman nga maghatud kini og perwisyo sa mga pasahero,gipasalig ni Atty. Dicdican nga kini temporaryo lang.
Nasayran nga mukabat ang repair project sa kantidad nga 255 million pesos kung diin palapdan ug patas-an ang runway sa 2 inches ang kabag-on samtang 3.4 kilometers usab ang taas niini.
Nasayran nga katapusang gi-ayo ang runway sa MCIA niadtong 2005.
