CEBU CITY– Sikop sa entrapment operation sa kapolisan sa NBI sa usa ka mall sa Cebu ang usa ka 62- anyos nga lalake nga nagpaka-aron-ingnong usa ka pari ug usa ka supervisor sa LTO (Land Transportation Office).
Giila ang suspek nga si Leonardo G. Olaivar ug residente sa Bohol.
Matod ni Atty. Wenceslao Galendez JR., supervising agent sa NBI 7 nga duha ka complainant ang nidangop sa ilang buhatan gumikan kay nailad matod pa sila sa suspek nga nihimo sa pekeng driver’s license.
Dugang pa niya nga P1500 matod pa ang bayad matag usa sa driver’s license nga ipahimo ni Olaivar.
Nasuta nga peke ang nahisgotang mga driver’s license gumikan kay klaro nga layo kini sa tinuod nga driver’s license.
Nasayran usab nga dili supervisor si Olaivar sa LTO, kini human nga nakig-coordinate si Galendez sa buhatan sa LTO 7.
Dili lang dinhi sa Cebu ang transaksyon sa supek kundi lakip na sa Bohol.
Sa pagkakaron anaa na sa detention cell ang naasoy nga suspek samtang gi-andam pa sa kapolisan ang kasong ipasaka batok niini.
