CEBU CITY – Nagpadayon ang hot pursuit karon kapulisan sa pagsikop sa suspect sa pagpusil patay sa usa ka Korean National sulod sa usa ka hotel sa Brgy. Mabolo kagabii.
Naila ang biktima nga si Ho Lee, hingkod ang panuigon, ug nagpuyo sa lungsod sa Liloan.
Matud ni PSInsp. Janelito Marquez, ang hepe sa Mabolo Police Station, nga ila karong gitutukan ang motibo kung kini duna bay kalambigitan sa iligal nga drogas sanglit nasayran nga usa ka drug personality ang maong koreano.
Una niini, basi sa statement sa usa ka eye witness nga gihuptan sa kapulisan nga nangayo pasaylo ang korean sa wala pa kini pusila. Matud pa nagpunay kini og ingon nga “sorry, sorry, sorry” ayha gipusil sa makadaghang higayon.
Nakabati usab matud pa og buto-buto ang mga nakacheck-in sulod sa mga kwarto ug sa dihang gisuta nila ang maong buto-buto nakita nila nga nagbuy-od na ang Korean national sa lobby sa hotel ug naligo na sa iyang kaugalingong dugo.
Wala usab matud pa nakabantay ang gwardiya nga dunay misulod nga armadong tao apan human sa nahitabo duna matud pay 4 ka book tao nga kalmang lang migawas sa hotel.
Dugang pa ni Marquez nga usa ang suspek nga natumbok nila karon apan duna kini kauban hayan apil usab kini nila karon nga gipangita.
Narekober gikan sa biktima ang sigrilyo, credit card, ug kwarta nga dili muminos 5,000 pesos.
Wala pa usab kabanay nga mi-claim sa maong Koreano ug gisuta na usab kini karon sa Consulate sa Korea para sa pagsubay sa kabanay sa biktima.
