CEBU CITY-Nasakmit sa otoridad ang dul-an 6 milyones ka pesos nga kantidad sa shabu atul sa ilahang buybust operation sa atubangan sa usa ka edipisyo sa may IT Park, Barangay Mabolo, dakbayan sa Sugbo, kagabii.
Ang subject sa maong operasyon usa ka menor de edad nga giilang si Ethan Luke Quijada, 17 anyos, kinsang residente sa Quijada Compound, dakbayan sa Sugbo.
Nasikup ang maong subject lakip ang mga kaubanan niini nga sila si Hubert Plarisan, 22 anyus, residente sa Danaoan Biga, Toledo City, ug Orville Quijada, 21 anyus, residente usab sa Quijada Compound, Barangay Guadalupe, dakbayan sa Sugbo.
Nakumpiskar sa mga dinakpan ang lima ka pakete sa shabu kung diin sa kinatibuk-an mitimbang ug 500 grams, drug paraphernalias ug ingun man ang awto nga ilahang gisakyan.
Gitan-aw usab karon sa Cebu City Police Office ang posibilidad nga kalip sa drug syndicate ang menor de edad nga nasikop sa buybust operation sa may IT Park,Brgy. Mabolo dakbayan sa Sugbo.
Matud ni PCI Jackyll Biribli ang hepe sa City Drug Enforcement Unit (CDEU) sa CCPO nga posible usab nga gigamit ang minor nga si Ethan Luke Quijada ug ang kauban niini sa mga bigtime drugpusher sanglit nasuta nag makadispose kini og 1.5 kilos nga shabu matag semana.
Gani kini matud pa ang nagsupply og shabu sa dakbayan.
Giingong nakugang usab ang mga kapulisan sa dihang nahibaw-an nila nga menor de edad ang ilang ka transaction sanglit dako ug hingkod na kini tan-awon.
Apan bisan paman og minor pa kini pasakaan gihapon nila ang subject og kasong kalapasan sa Sec. 5 and 11 sa RA 9165 o ang Comprehensive Dangerous Drugs Act. samtang nagpaabot pa sa certificate of discernment gikan sa DSWD.
