CEBU CITY – Gipasidunggan og “Medalya ng Sugatang Magiting” (PNP Wounded Personnel Medal) sa Police Regional Office (PRO-7) ang pulis nga si PO1 Berlino Ricafort sa Fuente Police Station.
Kini human nga nakaangkon og grabe nga head injury sa dihang mi-responde kini sa usa ka alarma sa may Dan Escario, Brgy. Kamputhaw niining dakbayan kagahapon tungod sa usa ka giingong naay problema sa pangutok ang namato sa mga sakyanan.
Imbis nga maminaw ang giingong “buang” gihapak matud pa sa ulo gamit ang dako nga bato si Ricafort hinungdan nga nakaangkon kini og lawom nga samad sa ulo.
Nunot niini, nagkanayon si PCSupt. Debold Sinas, ang Regional Director sa PRO-7, nga nagpakita lang kini nga dedicated ang mga pulis nga muresponde sa alarma bisan pa og masamdan.
Gani iyang gibutyag nga sila ang mu-abaga sa tanang gasto sa ospital kung diin naoperahan si Ricafort ug sila usab ang mugasto sa mga tambal nga i-maintain niini sanglit usa pa ka gyud kini ka PO1.
Samtang, nakabsan sa kinabuhi ang naasoy nga dunay daot sa pangisip kinsang napusilan ni Ricafort kagabii nga giilang si Susanito Ellama.
