Cebu City- Anggulo nga pagpanimawos maoy gisundan karon sa kapulisan sa dakbayan sa Mandaue sa pagpamanhig nga nahitabo sa P. Burgos Street, Brgy Alang alang kagahapon sa hapon diin 1 ang patay samtang 1 samdan.
Matud ni Police Supt. Julian Entoma, ang city director sa Mandaue City Police Office nga daan na silang nakadawat ug impormasyon gikan sa kapulisan sa Ozamis City nga manimawos ang mga ka grupo sa mga gituohang miembro sa Kuratong Baleleng group kinsang nalambigit usab sa Parojinog drug group human mapatay sa operasyon ang duha nila ka sakop nga sila si Mark Lester Castillo ug Renan Navida.
Kini human nga ang napatay nga Brgy Tanod nga si Paulino Vega ug ang pag-umangkon niini nga si Ian Vega maoy gitudlo nga dunay koneksyon sa maong grupo.
Dugang ni Entoma nga nagtuo ang grupo nga gi traydor sila maong napatay ang ilang mga sakop.
Gibutyag usab ni Entoma nga basi sa ilang pakig-alayon sa Ozamis City Police,gipagawas matud pa sa grupo didto sa Ozamis nga aduna silay protektor nga barangay official sa Brgy Cubacub. Sa pakig-alayon sa kapulisan ni Brgy Kapitan Almario Bihag gihimakak niini ang pasangil hinungdan nga nagduda si Entoma nga si Edgar Bihag maoy gipasabot sa grupo.
Nasayran nga kauban nila ni Kapitan Almario Bihag ug Konsehal Edgar Bihag ang magsuong Nelson ug Rolando Vega aron nga limpyuhon ang ilahang pangalan sa kapulisan kabahin sa gi-alegar nga koneksyon nila sa grupo sa Kuratong Baleleng group ug Parojinog drug group sa ilang lugar.
