Cebu City-Nagpabiling tanhaga alang sa mga nagbantay nga mga sakop sa Philippine National Police sa ground zero sa Brgy Tinaan, dakbayan sa Naga ang pagtapok ug pag uwang sa mga iro matag alas-sais sa gabie ug alas dose sa tungang gabie.
Matud ni PO1 Baby Mark Tabaniag, usa sa mga na assign aron sa pagbantay sa ground zero, nga napamatud-an gayud niini ang stoprya sa mga tawo kabahin sa pagtapok sa mga iro sa basketball court duol sa command center ug dayon mu uwang samtang nag atubang sa ground zero sa nahisgutang mga oras.
Makapanglibawot sa balahibo matud pa paminawon ang matang sa uwang sa iro ug lahi sa naandan.Usahay makabantay usab sila nga dunay nag agulo sa maong dapit nga susamang nadat-ugan ug nasakitan pag-ayo.
Sa higayon nga ilang susihon, mahunong ra man ang tingog ug wala man silay mabantayan nga tawo sa lugar.Duna usab matud pay higayon nga makapanimaho sila ug baho sa pormalin nga gigamit aron ma preserbar ang lawas sa patay.
Matud pa nga wala may haya sa maong dapit ug taud taud na usab nga nalubong ang mga residente nga apil nga natabunan sa maong insidente.
Nasayran nga 41 na kaadlaw sukad ang nahitabong killer landslide nga gikamatay sa kapin 70 ka mga tawo.
