Cebu City-Muabot sa 9.8 million pesos nga kantidad sa shabu ang nasakmit sa Cebu Waterfront PNP sa gipahigayong buybust operation sa may Sitio Nazarene, Brgy. Tinagoda dakbayan sa Sugbo.
Sikop ang subject nga si Leonorman Cañete Tabao, 25 anyos nga gitumnbol usab sa mga pulis nga usa ka High Value Target.
Matud ni PSI Jomar Pomarejos ang hepe sa Waterfront Police Station nga nakadawat sila og impormasyon nga namaligya og iligal nga drogas ang naasoy nga subject. Positibo usab kini nga nakompirmar.
Nakuha gikan sa posisyon sa dinakpan ang 4 ka dagkong pakete sa shabu ug usa ka extra large pack nga sa kinatibuk-an dunay gibug-aton nga 1,455 grams.
Samtang gihimakak sasubject nga si Tabao nga iya ang maong shabu. Matud niini nga gibilin lang kini sa iyang kabarkada nga ginganlan niini og “Jude” nga nagpuyo kilid sa pikas kwarto sa iyang gi-abangang balay ug ang sigon matud pa nga iya ra kining balikon dayon. Hinungdan nga mitugot siya.
Apan gi-angkon niini nga sayod siya nga shabu ang gibilin sa iyang amigo.
Dugang pa niini, sutaon pa usab sa kapulisan kung kini lakip ba sa mga bagong modus nga mag-abang og apartment ang mga drug pusher ug didto himoon ang iligal nga transaksyon.
