CEBU CITY — Personal grudge ang usa sa gilantaw nga anggulo sa kamatayon sa traysikad driver kinsang gipusil sa riding-in-tandem sa Brgy. Pilipog, sa lungsod sa Cordova, Cebu.
Base sa pasiunang imbestigasyon sa Cordova Police Station, mopauli na sa panimalay 56 anyos nga si Romeo Calunod human nga naghatod sa iyang pasahero.
Matud ni Police Staff Sergeant Renato Enot nga gisundan sa mga wala mailhi nga riding-in-tandem ang biktima hangtud nga gipusil sa backrider si Calunod.
Nakaangkon og samad pinusilan si Calunod sa iyang dughan ug sa iyang ulo nga miresulta sa iyang hinanaling kamatayon.
Narekober sa kapulisan ang tulo ka kabhang sa kalibre 45 nga armas.
Dugang pa ni Enot nga suspek si Calunod kaniadto sa pagpamusil, 10 ka tuig na ang nakalabay.
Kasamtangang gisubay sa kapulisan ang CCTV footage sa highway duol sa nahitaboan sa krimen alang sa identity sa mga suspek.
Kasamtangang gipangita sa kapulisan ang mga gunmen ubos sa hot pursuit operation.
