TALISAY CITY – Gipatay ug gigapos sa usa ka poste ang gituhu-ang drug user sa Barangay Campo 4, dakbayan sa Talisay, pasado alas 2 kaganihang kaadlawun.
Giila ang biktima nga si Jerh Sege, adunay mga anak, usa ka welder ug lumulupyo sa nahisgutang dakbayan.
Sa pakighinabi sa Bombo News Team ni Charles Sege, ang manghud sa biktima, matud pa nga kaniadtu pang nakalabay nga semana wala mu uli ang iyahang maguwang, hinu-un, nagpadayun lang ang ilahang komunikasyon.
Apan ilaha nang gikahibulung human nga wala na gayud kini mu text o mu chat kanila sa katapusang tulu kaadlaw.
Giangkun usab sa naasuy nga manghud nga tiggamitan ug ginadili nga drugas ang iyahang maguwang apan wala gayud kini mamaligya, gani, giingung mu uban kini sa ilahang amahan arun nga mang-welding.
Narekober sa crime scene ang siyam ka kabhang sa bala, ingun man adunay karatola nga nakapaskil kung diin nagkanayon, “Undang na lage mo kung dili gani kamo na isunod. Tulisan, drug pusher og killer, drug lords”.
Nagpadayun karun ang imbestigasyon sa Talisay PNP.
Nasayran nga mao na kini ang ikaunum nga patay sa nahisgutang dakbayan sulud lang niini nga semana.
