CEBU CITY — Hugot nga gibarugan sa usa sa mga survivors sa nasunog nga Lite Ferry 16 nga walay taga-Philippine Coast Guard (PCG) ang miresponde pipila ka oras human miulbo ang sunog sa maong barko sa dagat sa Dapitan City, Zamboanga Del Norte.
Sa pagpakighinabi sa Bombo Radyo usa sa mga survivors nga si Fred Castro, kini nagkanayon nga wala silay nasigpatan nga mga rescuers, ingon man barko nga gikan sa Coast Guard.
Matud ni Castro nga sa dihang milabay ang laing pribadong barko duol sa ilang nahitaboan, misinggit ang pipila ka mga sakay kanila nga mo-ambak na lang imbes nga mohuwat sa Coast Guard aron maluwas ang ilang kinnabuhi.
Gibutyag usab sa survivor nga nag-una-una usab og ambak ang mga crew sa barkong Lite Ferry 16 aron maluwas ilang kaugalingon.
Nabantayan usab ni Castro nga miresponde ang mga naka-uniporme nga sakop sa PNP sa Dapitan City sakat sa usa ka pribadong barko.
Tungod sa nasinating kahadlok sa maong survivor, nag-ampo na lang kini nga unta naay moabot nga milagro kanila.
Midepensa ang tigpamaba sa PCG-7 nga si Lieutenant Junior Grade Michael John Encina nga mipahigayon ang Dapitan Coast Guard og rescue operations nianang panahona, base na sa ilang pag-contact.
Dugang pa ni Encina nga gisiguro sa Coast Guard nga gibuhat ang ilang responsibilidad pinaagi sa pag-coordinate sa uban pang mga shipping companies alang sa rescue operation.
