CEBU CITY – Mikabat sa P700,000 ang danyos sa nahitabu nga sunog pasado alas 11 kaganihang buntag sa Wangyo Alaska, Barangay Mambaling, dakbayan sa Sugbo.
Sa pakighinabi sa Bombo News Team kang SFO3 Oliver Tautho, giingung nagagikan ang sunog sa panimalay sa magti-ayun nga Mamerto ug Hermisa Ravena kung diin nasuta nga ‘faulty electrical wiring’ ang hinungdan sa pag-ulbo sa kayo.
Gipasaka sa Task Force Alpha ang maong sunog kung diin naugdaw ang 70 ka mga panimalay.
Hinu-un, wala may natala nga samdan o namatay gumikan sa insidente.
Samtang, magpahigayun ug special session ang Mambaling Barangay Council arun sa pagdeklarar ug state of calamity, kini basi sa pamahayag ni Konsehal Seller Salvador.
Abagahon usab sa lokal nga kagamhanan sa syudad ang tulu kaadlaw nga kaon sa nasunogan sugud karung gabii.
Gibutyag ni Dr. Jeffrey Ibones, ang head sa DSWS nga makadawat usab ug P20,000 nga cash assistance ang mga nasunogan, P10,000 sa mga sharer ug P5,000 usab alang sa mga nag-abang.
Sa habig usab sa DWUP, gipahibalu ni Simeon Romarate nga mupahigayun sila ug clearing operation sa lugar ingun man reblocking gumikan kay nag-unang ‘concern’ sa area mao ang kahagip-ut sa agi-anan ug dili basta makaresponde kung ugaling adunay emerhensiya.
