SUBLI nang ablihan ang Cebu City Museum karung Oktubre 16, adlaw nga Miyerkules human ang ‘renovation’ niini.
Gipahibalu ni Bryner Diaz, ang Cultural and Historical Affairs Office (CHAO) OIC, nga adunay titulo nga “Kalandrakas” ang subli nga pag-abli sa maong museum kung diin langkuban kini sa ‘exhibit’ sa mga local artist.
Matud pa nga makita sa maong exhibit ang ‘obra’ sa mga local artist sa Sugbo ug uban pa.
Gidugang usab ni Diaz nga nangandam na usab sila alang sa ilahang mga kalihukan sunod tuig kung diin pagasugdan kini ug usa ka classical concert nga mulanat ug duha ka adlaw paingun na sa kasaulogan sa Sinulog sa buwan sa Enero.
Katuyoan sa maong konsyerto ang pag-introduce ilabi na sa mga kabatan-unan sa kaanindut usab sa classical music.
Ang maong classical concert ang libre alang sa tanan apan ‘first come, first serve basis’ ang ilahang sundon.
Gipasabut ni Diaz nga adunay daghang kabilin sa dakbayan sa Sugbo nga angayang masayran ug ampingan sa kasamtangan ug musunod pa nga mga henerasyon.
