CEBU CITY — Mireklamo ang pito ka mga Overseas Filipino Worker (OFW) ngadto ni Cebu City Mayor Edgardo Labella gumikan sa gisudlan nila nga agency diin wala motakdo sa ilang kontrata ang trabaho sa Qatar.
Gireklamohan sa mga OFWs ang agency nga Panacea International Employment Resources Agency Inc. kung diin lahi nga trabaho ang nagpaabot kanila didto.
Gibutyag ni Katrina Calago, usa sa mga OFW nga housekeeping ang iyahang gi-applayan sa maong agency apan lain-lain nga trabaho ang iyang gibuhat sa Qatar.
Nahimo siyang waitress, tiglimpyo sa balay, barista ug uban pa nga matod pa ug unsay bakante nga trabahoon ipabuhat nila.
Kapait ug kalisod ang ilang natagamtam sa maong nasud kung diin napriso pa silang pito human gipasakaan sila og kasong ‘run away’ nga wala gyud nila mabuhat.
Human sa pagka-priso gipa-deport sila ug gipangayoan og placement fee nga di mominos sa P8,000.
Gusto sa nahisgutang mga OFWs nga sirad-an ang maong agency ug makuha ilang sweldo ingon man ang ilang placement fee nga nabyaran gumikan sa ilang kasiatian.
Gibutyag sa laing biktima nga si Sarah Mae Solon nga housekeeping iyang gi-applayan sa maong teacher assistant, waitress, ug tiglimpyo sa balay pag-abot sa Qatar.
Matod ni Solon nga nindot unta paminawon ang ‘teacher assistant’ apan dili susama kanindot ang iyahang nasinati diin nahimo kining siyang tig-ilo sa mga estudyante nga 2-anyos, tigpakalibang, ug tigpakatog.
Dugang pa ni Solon nga wala siya gitugot sa iyang amo nga mopahuway gumikan sa pagpanakit sa iyang lawas dala sa sobra nga pagpanarbaho.
Human nakabati si Labella sa maong reklamo, misaad kini nga tabangan ang mga OFWs nga pulos taga-Cebu City diin ilang pasakaan og kaso ang maong agency.
Matud ni Labella nga hatagan niya og legal counsel ang mga biktima aron matabangan sa pagpasaka og kaso.
Gihimug-atan sa mayor nga ihunong gayud ang pagpadala sa mga domestic helpers sa Middle East gumikan kay mabiktima gayud sila sa pagpang-abuso.
