CEBU CITY — Na-rescue sa Philippine Coast Guard (PCG) ang 11 ka mga pasahero ug crew sa usa ka motorbanca human kini mitikyaob sa kadagatan sa Brgy. Cangmunag, San Juan, Siquijor.
Matud sa report gikan sa PCG nga mibyahe ang maong motorbanca gikan sa Dipolog City padung sa Masbate niadtong Nobyembre 16 diin aduna kini sakay nga upat ka pasahero ug pito ka crew.
Nagkarga usab ang maong sakyanang pandagat og walo ka drum nga diesel ug 22 ka empty fuel drums.
Dugang pa niini nga naabtan ang maong motorbanca og kusog nga bawod sa dagat hinungdan nga mitikya-ob kini.
Daling miresponde ang PCG-Siquijor ngadto sa na-capsize nga motorbanca hinungdan nga naluwas ang tanang mga sakay.
Mihatag dayon ang PCG-Siquijor og medikal nga atensyon ngadto sa mga pasahero ug crew aron masiguro ang maayong kondisyon niini.
Narekober usab walo ka drum sa diesel ug ilang gihipos ngadto sa Barangay Cangmunag samtang gibantayan nila ang maong kadagatan aron malikayan ang oil spill.
