Gisugdan na sa Philippine Coast Guard (PCG) ang pag-imbestigar sa posibleng mga kapakyasan ug kapabayaan sa kapitan ug mga krew sa MV June Aster human misaka na sa 76 ang namatay sa nahitabong sunog sa barko duol sa Coron, Palawan.
Gibuhat sa PCG ang ilang Maritime Safety Investigation ug Maritime Crime Investigation units aron masayran ang tunhay nga hinungdan sa sunog ug kon nasunod ba ang husto nga mga emergency procedures.
Sumala ni PCG spokesperson Commodore Noemie Cayabyab, gisusi sa mga imbestigador ang mga pahayag sa mga naluwas ug ang mga aksyon nga gihimo sa mga tripulante sa wala pa, samtang nahitabo, ug human sa insidente, lakip na ang pagtino kung naghatag ba ang kapitan og tukma nga mga pahimangno ug instruksyon ngadto sa mga pasahero.
Gipasang-an usab sa PCG ang dakong tulubagon ngadto sa kapitan ug sa kompanya sa barko, sanglit ang kapitan man ang responsable sa kaluwasan sa tanang pasahero ug kargamento gikan sa sinugdanan sa biyahe hangtod sa destinasyon nga pantalan.
Gawas niini, gisusi usab sa PCG ang mga taho sa mga pasahero bahin sa kusog nga pagbuto nga gikan sa cargo deck sa wala pa miulbo ang kalayo.
