CEBU CITY — Gipadayag sa representante gikan sa Magdalo Partylist nga ang tinguha sa Malacañang mao ang pakauwawan si Vice President Leni Robredo.
Kini ang nahimong reaksyon ni Congressman Gary Alejano human mibwelta si Presidente Rodrigo Duterte nga wala niya gikasaligan si Robredo isip anti-drug czar.
Gibarugan ni Alejano nga klaro ug tataw ang estratehiya sa Duterte administration mao ang duguong kampanya sa gobyerno batok sa ginadiling drugas.
Matud usab ni Alejano nga gisaway sa administrasyon ang community approach ni Robredo sa kampanya batok drugas, isip co-chairperson sa Inter-Agency Committee on Anti-Illegal Drugs (ICAD).
Giklaro usab sa Magdalo representative nga gusto lang nga masayran sa bise presidente ang basic information sa mga drug personalities nga makatabang sa gihimo niining strategy.
Gihimug-atan usab ni Alejano diin gi-appoint ni Presidente Duterte si Robredo isip anti-drug czar aron mosunod sa ilang estratehiya sa kampanya.
Mihagit usab kini ngadto ni Duterte nga mas maayong papahawa-on si Robredo sa pwesto kung wala kini misalig kaniya. (GN)
