CEBU CITY-Patay ang kanhi PIB-7 Chief ug karon hepe sa Calbayog Leyte nga si Police Lt. Col. Joie Yape human kini gipa-uwanan og bala sa riding in tandem sa Molave St. Brgy. Kamputhaw, Cebu City, alas-6 sa gabii adlaw nga Huwebes petsa 21 sa Nobyembre.
Base sa impormasyon nga nakuha gikan sa hepe sa Abellana PNP nga si Pol. Captain Alejandro Quijano, naglakaw lang matud pa si Yape kauban ang asawa niini samtang padulong sa usa ka mall aron nga mangaon, apan gi-atngan matud pa kini sa riding in tandem ug gipusil.
Nakaangkon ug samad pinusilan ang biktima sa iyang ulo ug sa lain-laing parte sa iyang lawas. Wala hinoon maunsa ang asawa niini.
Base usab sa mga anaa sa area nga, nakabati sila og 3 ka boto ug taud-taud nakita nila nga nahagba na ang biktima. Nadala pa kini sa tambalanan apan gideklarar na sa mga doktor nga dead on arrival.
Personal grudge o work related ang unang gilantaw karon nga motibo sa kapulisan sa pagpusil patay kang Yape samtang nagpadayon usab ang ilang imbestigasyon.
Nasayran nga dunay gitambongan nga 3-day seminar ang kanhi PIB-7 chief sa Sugbo ug mupauli na unta kini sa Calbayog karong adlawa. (Lahvi Quiñones)
