CEBU CITY-Nanghinaot si Cebu Archbishop Jose Palma nga maangkon ug masilbi na ang hustisya sa mga pamilya nga biktima sa Ampatuan Massacre Case.
Kini ang nahimo’ng mensahe sa arsobispo atol sa pagpahigayon niini og misa sa unang adlaw sa Misa de Gallo sa Carbon Public Market, Disymbre 16,2019.
Gitino hinoon ni Palma nga ang pagawas sa resulta sa kaso ang labaw na sa iyang kaarang hayan nanghinaot na lang kini nga hingpit na gyud nga makuha ang hustisya nga alang sa mga biktima.
Samtang gipasabot usab ni Palma kung ngano nga sa Carbon Public Market kini nagpahigayon og misa sa unang adlaw sa misa de gallo.
Kini gumikan kay ang naasoy nga merkado ang importanteng kabahin matud pa sa komunidad ug nakita sa arsobispo ang kalig-on sa pagtoo sa mga anaa sa Carbon Public Market.
